Севярынец: «З Мікалаем Статкевічам ня «здарыўся інсульт». Мікалая Статкевіча давялі да інсульта. Там умеюць»

— З Мікалаем Статкевічам ня «здарыўся інсульт». Мікалая Статкевіча давялі да інсульта. Там умеюць — ламаць рукі-ногі, рваць сэрцы і дзіравіць страўнікі нават без лішняга дотыку, — піша Павел Севярынец.

Напрыканцы акрэсцінскіх карцэраў, недзе на трэці месяц, у мяне разбалеліся калені. Ня мог спаць. Два дні патрабаваў доктара, з'яўляецца.

— Ну?

— Ды во ногі баляць. Мусіць, хаджу па камеры шмат (адмыслова хадзіў у дзень па 25-30 км, два метры туды-назад, каб з адбоем адключацца).

— Аааа, — задаволена басіць доктар і адшчыквае мне ібупрафеніну. — Наконец-то.

— У сэнсе, — кажу, — наканец-та?

— Да мы всё думалі, когда уже... Это суставы. Суставы. Не от ходьбы, тут всегда... Всё правільно.

У ШІЗА чалавека свядома і мэтанакіравана даводзяць да калецтва. Турэмныя дактары толькі фіксуюць, «дзе тонка» ў таго ці іншага вязня, якога начальства вырашыла ламаць — і пасля вязня пераводзяць у адпаведную камеру.

А катоўні там на выбар.

Лядоўні, каб ламаць косці. Адзіночкі — «труны», дзе замуроўваюць на месяцы. Скразняковыя «трубы» для тых, у каго слабыя лёгкія...

Гэта сістэма, дзе ўсё падначалена галоўнай мэце.

Не ламаецца маральна — зламаем фізічна.

Непакорлівых, сваіх жа «шасцёрак», якія накасячылі, «блатных», і, канечне, палітычных.

Калі не высыпаешся тыднямі ад холаду, пачынаеш бачыць галюцынацыі, разбіваешся аб плітку, бо раптам адключаешся ўдзень, і раз за разам атрымліваеш «ДП» (дабаўку) — пытанне толькі ў тым, што цябе вырубіць спярша: язва (бо арганізм жарэ сам сябе), запаленне лёгкіх, інсульт, інфаркт альбо вар'яцтва.

Там ня проста ўсё выдатна ведаюць — там мэтанакіравана і тэхналагічна трушчаць чалавека.

І гэта — яўнае крымінальнае злачынства.

Ані маральна, ані псіхалагічна Міколу Статкевіча яны не зламалі.

Годнасць і любоў да Беларусі — не разбіць, не спыніць, не стрымаць.